የልጅ ዮናስ ቀልድ እና ቁም ነገር!: አህያ!

የሜዳ አህያን ሁሉም ሰው በዱር በገደል ባዝኖ ፎቶ ያነሣታል፡፡ ሸክሙን የምትጋራለትን አህያ ግን ማንም ፎቶ አያነሣትም፡፡ ፎቶ በቀረና አህያ ብሎ መሳደብ ገደብ ቢያገኝ አህያም ትመኝ ነበር፡፡ አህያ የተናቀች ናት፡፡ መልክ የላትም፣ ፈጣን አይደለችም፣ ጉልበቷም ብርቱ አይደለም፡፡ ትልልቅ ጆሮ ቢኖራትም ለመስማት፣ ትልልቅ ዓይን ቢኖራትም ለማየት ትቸገራለች፡፡ ሰዎች ሁሉ የንቀት ሸክማቸውን የሚያሸክሙት ለአህያ ነው። አህያ ተብሎ የተሰደበም እንደከፋው ይኖራል፡፡ ምሥጢሩ ግን የጌታ ማረፊያ ማለት መሆኑ አይገባውም፡፡ ጌታችን በዚህች አህያ ላይ ተቀምጦ ንግሥናውን መግለጡ የተናቁትን የሚያከብር አምላክ መሆኑን ለመግለጥ ነው፡፡

አህያን ለሸክም እንጂ ለሰው መጓጓዣነት አትፈለግም፣ አትሸለምም፡፡ ጌታ ግን ሸላልሞ ተቀመጠባት፡፡ ልብሳቸውን እንዳትነካ የሚሸሿት ሰዎች ዛሬ መሬት ላይ አነጣጠፉላት፡፡ ጌታ ተቀምጦባታልና ስለ ጌታ አከበሯት፡፡ እንዲሁ የተናቅን፣ የተረሳን፣ ጅሎች፣ ነገር የማይገባቸው የተባልን ብንሆን ጌታ ብቻ ይረፍብን፤ ያን ጊዜ እንከብራለን፡፡ ራሳችንን ለማስከበር ለመማርና ለመድከም ጌታን ለመሸከም ማሰብ አለብን፡፡ ከራሳችን የተነሣ ሳይሆን ከጌታ የተነሣ የሆነ ክብር የማይጠፋ ክብር ነው፡፡ የተናቁትን ጌታ ያከብራል፡፡ እግዚአብሔር ላንተም ላንቺም ቀን አለው፡፡ በቀናችሁ እናንተን መግፋት ማንም አይችልም፡፡

የጥንት የእስራኤል ነገሥታት በፈረስ ተቀምጠው በሕዝቡ መሐል ሲመላለሱ ጦርነት እንዳለ እየጠቆሙ ሕዝቡን ተነሥ ማለታቸው ነው፡፡ በአገራችን ፋኖ ፋኖ እየተባለ ሲዘፈን ቀጥሎ የሚጠበቅ ነገር አለ፡፡ ኢትዮጵያ አገራችን እየተባለ ሲዘፈን አገርን መጥራት በጦርነት ቀን እስኪመስል ሁሉም አንድ ነገር ያጭርበታል፡፡ በእስራኤልም ነገሥታት ልማድ ፈረስ ላይ ተቀምጦ ጦር ይዞ መታየት ጦርነትን ማወጅ ነውና ሴቱ ለስንቅ፣ ወንዱ ለትጥቅ ይዘጋጅ ነበር፡፡ በአህያ ላይ ተቀምጦ ከታየ ግን አገሩ ሰላም፣ ምድሩ በረከት እንደሆነ መግለጡ በመሆኑ ጎበዝ ሊዳር፣ ቆንጆ ሊኳል ይሰናዳል፡፡

ጌታችን በአህያ ውርንጭላ ተቀምጦ ወደ ኢየሩሳሌም መግባቱ ንጉሠ ሰላም ወፍቅር መሆኑን ለመግለጥ ነው፡፡

እነዚያ አህዮች የተላኩላቸውን ሁለት ደቀ መዛሙርት ቢገፉ አይፈቱም ነበር፡፡ እያሠረ ለሚገዛቸው ጌታ ባሪያ ሆነው ይቀሩ ነበር፡፡

— withEliyas Zeleke and Ephrem Mezgebe.