የልጅ ዮናስ ቀልድ እና ቁም ነገር!: መክሊት

አንድ ወጣት ልጅ ከአባቱ ጋር ሆኖ በባቡር ተሳፍሮ ይጓዝ ነበር። በድንገት በባቡሩ መስኮት እያየ እየዘለለ እንዲህ እያለ ጮኸ “አባቴ እይ ዛፎቹ ወደ ኋላ እየሮጡ ነው” አለ። አባትየው ፈገግ አሉ። ከአጠገቡ የተቀመጡ ሰዎች ግን በልጁ ጸባይ አልተደሰቱምና በሕብረት አፈጠጡበት። በልባቸውም ተነጫነጩ። ልጁ ከእንደገና እየዘለለ “አባቴ አይታይህም እንዴ ደመናዎቹ ከኛ ጋር እየሮጡ ነው” አለ። ይህን ጊዜ ተሳፋሪዎቹ በጣም ተናደዱና ልጅህን ለምን ሆስፒታል አትወስደውም? ብለው አባትየው ላይ በሕብረት ጮኹ።

አባትየውም ፈገግ እያሉ ሆስፒታልማ ወስጀዋለሁ። እንዲያውም አሁን እኮ ነው ከ

ሆስፒታል የመጣነው። ልጄ ከልጅነቱ ጀምሮ ዓይነ ስውር ነበር። ዛሬ ገና ዓይኑ ስለበራለት ነው እጅግ የተደሰተው አሏቸው።

ሁሉም ሰው በራሱ ዓለም የራሱ የሆነ ታሪክ አለው። ማንንም ሰው በሚገባ ሳናውቅ አንፍረድ። እውነታውን ስናውቅ ሊያስገርመን ይችላልና አሉ የልጁ አባት አሁንም ፍግግ እያሉ። ሰዎቹ በስራቸው ተሸማቀቁ። ልጁም ነገሩ ስለገባው እንዲህ አላቸው። ወገኖቼ ለብዙ ዘመናት ብርኃንኔን አጥቼ ነበር። እንደ መጻጉዕ ሰው የለኝም ብዬ ተስፋ ቆርጬ ነበር። ብዙ ተባዙ ምድርንም ሙሏት ብሎ ይህን ሁሉ ሕዝብ ፈጥሮ ሰው የለንም ስንል ይገርመኛል። ይህን ማለታችን ግን አያስወቅሰንም። ታላቁ ነቢይ ነቢዩ ኤልያስም ሰው የለኝም ብሎ ነበርና። በአንድ ወቅት ኤልያስ ብቸኝነት ተሰምቶት ነበር። እንኳን እኛ ነቢያቱም ብቻዬን ነኝ ብለው ነበር። በተለይ በስደት ሀገር ብቸኝነት ይሰማናል። ይሁን እንጂ እግዚአብሔር ያለው ሰው ብቻዬን ነኝ ሊል አይገባውም።

ልጁ የዐይኑን ኳስ እያንከባለለ ንግግሩን ቀጠለ።

በጨለማው ዘመን ብቸኝነት ቢሰማኝም ዓይኑ የበራለት የበጥለሚዮስን ታሪክ ስለማውቅ ተስፋ ነበረኝ። ብርኃንን የመሰለ ነገር ምን አለ! ብርኃን መክሊት ነው። ይህን መክሊታቸውን ያላከበሩ ብዙ አሉ። ይህች የዛሬ ብርኃኔ ብዙ መክሊትን ማትረፍ አለባት። በጨለማው ዘመኔ የዓይን ስፔሽሊስት ለመሆን ተምሬያለሁ። እውቀቱ አለኝ። የሚቀረኝ ልምድ ብቻ ነውና ለዓይን አልባ ወገኖቼ በነጻ ሕክምና መስጠት አለብኝ። ይህች የዛሬ ብርኃኔ ብዙ መክሊትን ማትረፍ አለባት አላቸው።

መክሊት!

አምስት መክሊት የተሰጠው አትርፎ አሥር አደረገ።

ሁለት መክሊት የተሰጠውም አትርፎ አራት አደረገ።

አንድ መክሊት የተሰጠው ግን መክሊቱን ቀበራት!

አምስት መክሊት ያለው ሙሴ ነው። አምስት መጻሕፍት አሉትና። ሁለት መክሊት ያለው የቅ/ጴጥሮስ ምሳሌ ነው። ብሉይና ሐዲስን አስተምሯልና። አንድ መክሊት የተሰጠው መክሊቱን ቀበረ። ይህም ይሁዳ ነው።

አንድም አምስት መክሊት የተሰጣቸው አስተምረው ፣ መክረው ፍሬ አፍርተው ፣ ቀልጸው ልክ ራሳቸውን አስመስለው ደቀ መዛሙርትን ያሳደጉ የፍጹማን ምሳሌ ናቸው። ቅጳውሎስ ጢሞቴዎስን እንዳስተማረ፤ ቅ/ጴጥሮስ ቀሌምንጦስን እንዳስተማረ። አንድ መክሊት ተሰጥቶት መክሊቱን የቀበረው ግን ተምሮ ያላስተማረ ሰው ምሳሌ ነው።

አንድም አምስት መክሊት የፍጹም ፍቅር ፣ የፍጹም ትህትና የፍጹም ትዕግሥት ምሳሌ ነው።

አንድም አምስት መክሊት ያላቸው ጳጳሳት ናቸው።

ሁለት መክሊት ያላቸው ካህናት ናቸው።

አንድ መክሊት ያለቻው ዲያቆናት ናቸው።

ከኛ መካከል መክሊታችንን የቀበርን ስንቶቻችን እንሆን? የበዛ ስጦታ እያለን ቤተክርስቲያንን አለማገልገል መክሊት መቅበር ነው። ምርጥ ዕቃ የተባለው ንዋየ ኅሩይ ቅ/ጳውሎስ የጸጋ ስጦታ ልዩ ልዩ ነው እንዳለው እያንዳንዳችን የተሰጠን ጸጋ አለን። ይህን ጸጋ አለማወቅና በተሰጠን ጸጋ አለመስራት መክሊትን መቅበር ነው።

እስቲ የኔ መክሊት ምንድን ነው? ብላችሁ ራሳችሁን ጠይቁ፤ አሁን ደግሞ መክሊቴ ያለው የት ነው? የመክሊቴ ትርፍ ስንት ነው? በሉ።
ለብዙ ዘመናት መክሊታችንን ቀብረን ነበር። ዛሬ ሁሉም የራሱን መክሊት ይወቅና ያትርፍ።

መክሊቴን ቀብሬ ባሳዝንህ (ማቴ. 25÷14-30)
መብራቴንም ይዤ ባልጠብቅህ
በታላቅ ይቅርታ እንድትምረኝ
በፍቅርህ ጎብኝተህ ከሞት አውጣኝ
የኔን ስራ ተወው ምግባሬን
የመስቀሉን ነገር መርሳቴን (ገላትያ 3:1)
አዚሜን አንስተህ አንተን ልይህ
ኢየሱስ ክርስቶስ አምላኬ ነህ።

ቸርነትህ ነው ያደረሰኝ እስከ ዛሬ
ቸርነትህ ነው የጠበቀኝ እስከ ዛሬ
ላመስግንህ የኔ ጌታ በዝማሬ /2/

Visit this Blog! http://yonas-zekarias.blogspot.com/