የልጅ ዮናስ ቀልድ እና ቁም ነገር!: “የፌቤን ደብዳቤ!”

በሬ ሲስብ ጅራፍ ፈረስ ሲጋልብ አለንጋ እንዲያጮኹበት አነቃቃችኋለሁ እያለ ሐዋርያው የፌቤንን ደብዳቤ መጻፍ ዠመረ።

ሐዋርያት ዓለምን ዕፃ በዕፃ ተከፋፍለው ሲያስተምሩ ለቅ/ጴጥሮስ ሮም ደረሰችው። ሮም ከማየ አይኅ /ከጥፋት ውኃ/ አስቀድሞ አርስጣጣሊ ትባል ነበር። ከማየ አይኅ በኋላ ውሉደ ከይተም ሰፍረውባት ከይተም ተብላለች። በኋላም እንጣሎስ ነግሦባት ኢጣልያ ተባለች። በኋላም በሀገራችን ሁለት ወንድማማቾች አብርሃ ወአጽብሐ ነግሠው እንደነበር በደማቅዋ ከተማም ሮምሎስና ሩማሎስ የተባሉ ወንድማማቾች ነግሠውባት በሮምሎስ ሮም በሩማሎስ ሮሜ ተባለች። በሮም አይሁድና ሮማዊያን አብረው ይኖሩ ነበርና ሁለቱም በቅ

/ጴጥሮስ ትምህርት አመኑ። ኋላ ግን እርስ በእርሳቸው ተጣሉና አንዱ በአንዱ ላይ ይታበይበት ዠመር።

አይሁድ እኛ ከጥንት ዠምረን የእግዚአብሔር ወገኖች ነን ይሉ ዠመር። ከአብርሐም ወገን ግዙራን ስንሆን እናንተ ቈሉፋን /ያልተገዘራችሁ/ ናችሁ ብለው ተኩራሩ።

አሕዛብም በተራቸው ይከራከሩ ዠመር። ለአይሁድም እንዲኽ አሉ።

ባሕሩን በተሻገራችሁበት እግራችሁ ወደ ቤተ ጣኦት ሮጣችሁበት።

ከግብፃዊያን ባርነት ነጻ ስትወጡ ባሕሩን ስትሻገሩ ንሴብሖ ለእግዚአብሔር ስቡሐ ዘተሰብሐ ብላችሁ ባመሰገናችሁበት አንደበታችሁ ጣኦት እንዲሰራላችሁ ለመናችሁ። አሮን አሮን ግበር ለነ አማልክተ ብላችሁ ባመሰገነ አንደበታችሁ ጣኦት አሰራችሁ። ሆሳዕና ባለ አንደበታችሁ በሳምንቱ ስቀለው ስቀለው ብላችሁ ጮኻችሁ።

ቀን ሲደርስ አንባ ይፈርስ እንዲሉ ቀኑ ደርሶ ወንጌላዊያኑ ወረደ ተወለደ ቢሉ የዮሴፍ ልጅ ብላችሁ አላምን አላችሁ።

ከጠገበበት ሸምት እንዲል የአብርሐም ዘር ነኝ ብትሉ የአብርሐም ምግባር እንደሌላችኹ እውነት ነው።

አንዲት ሴት ተዓምራት ስትሻ ብትመጣ እናንተን በልጅ እኛን በውሻ መስሎ ተናገረ። ማቴ [15: 26] በውሻ ከተመሰሉት ወገን የኾነው ጲላጦስ ንጉሳችሁ ይፈታላችሁ ቢላችሁ ንጉሥ ዘእንበለ ቄሳር ስትሉ ያለ ቄሳር ንጉሥ የለንም አላችሁ። ሀገሩም ሀገሩ ነገሩም ነገሩ እንዲሉአሁን የእናንተን ክፋት የእግዚአብሔርን ቸርነት ተናገራችሁ እንጂ ሌላ ምን ተናገራቹ አሏቸው።

እንዲህ ባለ ነገር ተጣልተው ሳለ ሮማዊት የኾነችው ፌቤን አይሁዳዊ ባል አግብታ በቆሮንቶስ ስትኖር ባልዋ ስለሞተ ተመልሳ ሮሜ ገባች። ሰዎችም የባልሽ እናት ሞተች ብለው ነገርዋት። ከሞተ እቴቴ ምን አለኝ ከአማቴ የማትል ደግ ሰው ናትና ልቅሶ ሔደች።

ጻድቃን ሳይቀጣጠሩ ይገናኛሉ እንዲል ፌቤን ለአማትዋ ልቅሶ በቆሮንቶስ ሳለች ቅ/ጳውሎስን አገኘችው። “በሀገርሽ ሮሜ ቅ/ጴጥሮስ ያስተማራቸው ደቀ መዛሙርት እንዴት ናቸው?” ብሎ ፌቤንን ጠየቃት።

ከሃይማኖት አልወጡም ነገር ግን እርስ በእርሳቸው ተከፋፍለው ይጣላሉ አለችው።

ቅ/ጳውሎስም የሮሜን መልዕክት ጽፎ በፌቤን እጅ ላከላቸው!

Visit this Blog! http://yonas-zekarias.blogspot.com/